Escoitamos falar moitas veces da riqueza e a importancia do noso patrimonio inmaterial, pero non tanto de quen adica o seu tempo a coidar deses coñecementos e das súas motivacións para facelo.

En BenCuriosa quixemos visibilizar ás persoas e colectivos que recollen, gardan e comparten estes saberes, que van dos oficios á tradición oral, pasando pola festa, a música e o baile, a cociña ou a memoria colectiva. 

Así naceu esta páxina web: un espazo dixital que é froito dun proceso de investigación, comisariado por Sara Fraga, que contou co apoio da Deputación da Coruña a través do seu programa de Proxectos Singulares.

Un espazo no que poderás coñecer a artesáns, mestras, artistas, investigadoras, contacontos,… Persoas que quixeron compartir connosco información de primeira man sobre o seu labor, metodoloxía de traballo e motivacións.